NG生BACKGROUND: 回流返港，冇太多人脈，家人離世，諗住係香港穩定生活，原因係想識個講廣東話女朋友。

事源係10月29日 GOODNIGHT識，一開始傾計正正常常，一直都表現真誠感覺。隨後NG生提及到近排黑仔，並表露出唔太想講，追問下NG生告知返港後，凌晨跑步坐低休息被人偷走銀包電話，現時身無分文。NG生: 利申，我唔會問女仔借錢嫁，你唔洗諗住幫我。本人當時並無任何意慾幫，諗住整聽就算。

隨後，NG生亦告知當時問了3位大學朋友，3人用不同原因推佢，佢感到十分沮喪，估唔到咁大個人竟然要苦惱幾千蚊去維持生活，表示屋企冇野食，只是飲水維生+食香口膠。本人心諗若真返港後冇人脈，其實可以地址外賣俾佢，NG生話唔好，咁樣食下停下反而胃仲辛苦，亦告知遺失銀行文件搞緊，大約11月中會拎到身份證，銀行要身份證明先得，身份證補領需370蚊，本人問咁你身無分文邊有錢?? NG生話希望到時間問可唔可以先拎身份證再俾錢，本人個陣無留意都無理性思考真假，一心覺得咁不如我借住先啦，幫到人就幫，自己都明白過冇人幫助個陣既心態，到時佢有錢俾返我咪得，亦強調多次如果你講既野係真，借唔係問題，會還就得了。

NG生話需要2500，一到11月中會還。NG生:2500蚊對我黎講係小數目，但對於你1個女仔黎講唔少，本人:到時你會還就可以了如果真係需要。NG生仍提及到自小家人點樣教導佢，分享自己個人心路歷程，內心感受，聽落完全係會令人想有一絲幫佢。佢冇死CHUR難CHUR，可能用反向心理令人信服佢係好人。

NG生問可唔可以試下用FPS過數1蚊俾佢，睇下仲WORK唔WORK，當然事後佢都有俾返1蚊我，以獲取我信任。最後我借左2500蚊俾佢，大約2-3日都有WTS，中間話睇醫生，但奇怪問佢咩藥，叫佢影張相，佢一直冇影到係到拖，我就知出事了...而佢慢慢就冇再覆。打去問佢講既東亞銀行，得知唔見左卡身份證既話網上都可以用，我就後悔個陣冇理性諗野，一心想幫。

直到12月21日，WTS換左相都未有任何回覆。稍後，會補返WTS相俾大家，因過程係用電話講所以冇上面提及的文字證據。

最後，我都感激佢教我上一堂真實既社會實驗，網上千其唔好信人，騙徒手法層出不窮，咁大個女第一次希望試下信網友，點知一相信就出事。$2500買到1個人既品格都值，錢我一定會搵得返，而呢件事都間接令我開創左副業，減壓得黎搵到自己樂趣!! 多撚謝你呀NG生!!